Bərdədə 14 yaşlı qıza qarşı seksual xarakterli hərəkətlər etmə ittihamı ilə həbs edilən, daha sonra azadlığa buraxılan şəxslə bağlı protest verilib.
Baş Prokurorluqdan “Yeni Gündəm”-ə bildirilib ki, Bərdə rayon məhkəməsinin 10 fevral 2022-ci il tarixli qərarı ilə bəraət alan şəxslə bağlı hökm işin faktiki hallarına uyğun deyil. Bu əsasla Cinayət Məcəlləsinin 152.1-ci maddəsi ilə təqsirli bilinib ona həmin maddənin sanksiyasında nəzərdə tutulan cəza təyin edilməklə yeni ittiham hökmü çıxarılması məqsədilə fevralın 15-də Baş Prokurorluq tərəfindən Gəncə Apellyasiya Məhkəməsinə protest verilib.
Xatırladaq ki, ötən ilin yayında Bərdənin Cumalar kənd sakini polisə müraciət edərək qızının 2020-ci ilin avqust ayında həmkəndlisi tərəfindən zorlandığını bildirmişdi. Ekspertizanın rəyi əsasında qızın bakirəliyinin pozulması müəyyən edilmişdi.
Məhkəmədə prokuror təqsirləndirilən şəxsin 2 il müddətinə azadlıqdan məhrum edilməsini istəsə də, hakim ona bəraət vermişdi.
