“Bildiyiniz kimi, “Siyasi partiyalar haqqında”qanun 1992-ci ildə qəbul edilib və buraya xeyli düzəlişlərlə əlavələr edib. İndi bunların hamısı qanunda daha sistemli şəkildə yer almalıdır”.
“Yeni Gündəm” xəbər verir ki, bu sözləri Yenisabah.az-a açıqlamasında Milli Məclisinin deputatı, Böyük Quruluş Partiyasının (BQP) sədri Fazil Mustafa deyib.
BQP lideri Azərbaycan Respublikasının Milli Məclisində təmsil olunan bütün siyasi partiyaların nümayəndələrinin “Siyasi partiyalar haqqında” yeni qanun layihəsinin hazırlanması üçün Milli Məclisin sədrinə edilən müraciətdən söz açıb.
F. Mustafa deyib ki, partiyaların quruluşunda, idarəetmə formasında dəyişiklər, eləcə də üzvlərinin sayında minimum standartların müəyyən olunması təklifi var:
“Habelə partiyaların seçkilərdə iştirakı, daha sonra Milli Məclisdə fraksiya yaratması imkanlarının yaradılması kimi məsələlər nəzərdə tutulur. Bütövlükdə yeni qanunun qəbul olunması ən azı partiya məsələsini daha da ciddiləşdirəcək və daha da çevik bir qüvvə olaraq siyasi partiyaların formalaşmasına xidmət edəcək”.
“Müraciətdə əlavə olaraq hansı təkliflər və istəklər mövcuddur” sualına isə millət vəkili belə cavab verib:
“Biz orada öz istəklərimizi qeyd etmişik. Məsələn, seçkilərdə iştirak məsələsi var. Belə ki, seçkilərdə iştirak etməyən partiyaların məhkəmə qaydasında ləğvi ortaya qoyula bilər, o cümlədən minimum 7 min nəfərdən artıq üzvünün olması nəzərdə tutula bilər ki, belə olan halda partiyalar daha ciddi quruma çevrilə, daha çox proqramlarla çıxış edə və daha çox üzv əldə edə bilər”.
