Böyük Britaniya Rusiya Federasiyasının fəaliyyətini izləmək və taxıl gəmilərini qorumaq üçün Qara dəniz regionuna kəşfiyyat təyyarələri göndərəcək. Bu barədə ölkənin baş naziri Rişi Sunakın ofisi məlumat yayıb.
Ofis Rusiyanın Qara dənizdəki fəaliyyətini izləmək üçün Britaniya kəşfiyyatından istifadə ediləcəyini vurğulayıb.
“Bu müşahidə əməliyyatlarının bir hissəsi olaraq, Kral Hərbi Hava Qüvvələrinə məxsus təyyarələr Rusiyanın mülki taxıl daşıyan gəmiləri qeyri-qanuni şəkildə hədəfə almasından çəkindirmək üçün ərazi üzərində uçuşlar həyata keçirəcək” dedi.
“The Daily Telegraph”ın qeyd etdiyi kimi, Kral Hərbi Hava Qüvvələrinə məxsus təyyarələr iyulun 17-də taxıl müqaviləsinə xitam verildikdən sonra Qara dənizdə Ukrayna taxılını daşıyan gəmilərin mühafizəsi əməliyyatında iştirak edir.
Bir gün əvvəl Sunak telefon danışığında Ukrayna prezidenti Vladimir Zelenskiyə “İyirmilik Qrupunun (G20) taxıl blokadasından yan keçmək səylərini” fəal dəstəkləyəcəyini vəd edib. Həmçinin Ukrayna prezidenti Böyük Britaniyanın baş naziri ilə telefon danışıqları zamanı Odessa vilayətinin hava hücumundan müdafiə sistemləri ilə gücləndirilməsini istəyib.
Bundan əvvəl taxıl müqaviləsi çərçivəsində sonuncu gəmi Qara dənizi tərk edib.
