“Çoxmərtəbəli binalarda yaşayış mədəniyyətinin aşağı olması heç kimə sirr deyil. O da məlumdur ki, belə binalarda hazırda idarəçilik yox səviyyəsindədir. Köhnə binaları MİS-lər idarə etmir, işləri ancaq pul yığmaqdır. Yeniləri isə MTK-lar istədikləri kimi idarə edir, sakinləri incidirlər”.
“Yeni Gündəm” -in xəbərinə görə, bunu ekspert Samir Əliyev bildirib.
S.Əliyev qeyd edib ki, ölkədə zəruri qanunvericilik bazasının olmasına rəğmən çoxmərtəbəli binalar inersiya gücünə idarə olunur: “İdarəetmənin qurulması çox vacibdir. Ancaq diqqəti insanların davranışına, mədəniyyətinə yönəltmək istəyirəm. Həyət evindən bina köçən bəzi insanlar çoxmərtəbəli binalarda yaşayış qaydalarına əməl etmirlər.
Bu qaydalar hansılardır? Vacib olan bir neçəsini diqqətinizə çatdırmaq istəyirəm.
1) Eyvandan yerə zibil atmamaq – Sakinlərin bəziləri əllərinə nə gəldi eyvandan yerə atırlar. Hətta zibildolu paketləri də atmağı çəkinmirlər.
2) Kondisioner suyunu həyəta axıtmamaq – Yay aylarında binaların qarşısından keçmək olmur, elə bil yağış yağır. Düşünmürlər ki, bu su zərərli olmaqla yanaşı insanların üstünü çirkləndirir.
3) Blokların, liftlərin təmiz saxlanılması – Hər gün təmizlənməsinə rəğmən liftlər infeksiya mənbəyidir. Detallara getmək istəmirəm, ancaq bəzi insanlar sanki liftlərdən qisas alır, hirsini liftin içinə tökür.
4) Su xətləri keçən ventilyasiya sisteminə heç nə qoşmamaq – Təsəvvür edin insalar var aspiratoru ventilyazsiya sisteminə yox, su-kanalizasiya xətləri keçən sisteminə qoşur, evdə bişirdikləri yeməyin iyi qonşuların evinə dolur.
5) Gecə saatlarında sakitçiliyin təmin olunması – Bəzən gecə sınmış nəyisə düzəldirlər, çəkicin səsi bütün binaya yayılır. Kimi stol-stulun üstündən tullanır, kimisi əlindəki əşyanı yerə atır. Bir sözlə, aşağı mərtəbə yaşayan qonşunu düşünmək istəyən yoxdur.
Əlbəttə bütün bunları düzgün mənzil idarəçiliyi qurmaqla aradan qaldırmaq olar. Ancaq bəzən hər şey insanın özündən asılı olur”.
