Milli.Az Kulis.az-a istinadən Əməkdar artist, aktrisa Kübra Dadaşova haqqında on maraqlı faktı təqdim edir.
Kübra Dadaşova 31 avqust 1957-ci ildə İçərişəhərdə aktyor ailəsində doğulub. Özündən böyük üç qardaşı olub. Kübra Dadaşovanın uşaqlıq illəri demək olar ki, Gənc Tamaşaçılar Teatrında keçib. Ata və anası aktyor olduğu üçün teatrda böyüyüb. Elə bu səbəbdən Kübra Dadaşovada az yaşlarından etibarən teatra maraq yaranıb.
1985-ci ildə Azərbaycan Dövlət İncəsənət İnstitutunun Mədəni-maarif fakültəsini bitirib. O, yaradıcılıq fəaliyyətinə hələ tələbə ikən – 1982-ci ildə Azərbaycan Dövlət Gənc Tamaşaçılar teatrında başlayıb. Aktrisa dramatik və komik səpkili rolları eyni bacarıqla yaradıb. “Qonşu qonşu olsa, kor qız ərə gedər”, “Ruhlar qapını döyür”, “Pul dəlisi”, “O da mənəm, bu da”, “Mağara”, “Mahmud və Məryəm”, “Buzovna kəndinin əhvalatları” tamaşalarında aparıcı rollar ifa edib. “Piriverdinin xoruzu”, “Cavid ömrü”, “Yuxu”, “Gecə qatarında qətl”, “Nə gözəldir bu dünya” filmlərinə çəkilib.
***
Kübra Dadaşovanın qardaşları da incəsənətə bağlı adamlardır. Bir qardaşı Mədəniyyət və İncəsənət Universitetində fotoqraf ixtisasına yiyələnib, hazırda Moskvada yaşayır. İkinci qardaşı Rauf Dadaşov Əməkdar rəssamdır. O da uzun müddət kinostudiyada işləyib.
Lap kiçik qardaşı Namiq Dadaşov isə Gənc Tamaşaçılar Teatrında aktyor işləyib, elə orada aktrisalardan biri ilə ailə həyatı qurub.
Kübra xanım ata evində qardaşı ilə yaşayıb. Gözəl əl qabiliyyəti olub, evi həmişə qonaq-qaralı olub. Toy-bayramda da yaxşı iştirak edən, məclis adamı olub. Oynamaqla da arası çox yaxşı olduğundan toylarda ortalıqdan çıxmazmış.
***
Sənətini çox sevib, amma maaşının azlığından gileylənib deyərmiş:
“Bu sahədə maaş çox azdır. Əlimdən başqa iş gəlsə, aktyor sənəti ilə məşğul olmaram. Lakin nə edim ki, ancaq artistliyi bacarıram. Ən sevdiyi rolları isə “Mahmud və Məryəm”, “Pirverdinin xoruzu” filmlərindəki obrazları olub.