“Formula-1” yarışçısı Lyuis Hemilton Avstraliyadakı meşə yanğınları ilə mübarizəyə 500 min dollar ayırmaq niyyətindədir.
“Yeni Gündem”in məlumatına görə, bu barədə o, Tvitter hesabında yazıb.
Britaniyalı Avstraliyanın şərq sahilində baş qaldırmış təbiət hadisəsindən çox narahat olduğunu qeyd edib: “Avstraliyada yanğınların törətdiyi dağıntılar və ölkə sakinlərinin, eləcə də flora nümayəndələrinin rastlaşdığı çətinliklər ürəyimi parçalayır”.
Yarışçının səlahiyyətli şəxslərə verəcəyi məbləğ heyvanların qorunması layihələrinin maliyyələşməsi, bu sferada çalışan insan və yanğınsöndürənlərə dəstək məqsədi ilə xərclənəcək.
Xatırladaq ki, daha əvvəl Avstraliyadakı meşə yanğınları ilə mübarizəyə rusiyalı tennisçi Mariya Şarapova 25 min dollar, Avstraliyalı aktrisa Nikol Kidman və müğənni Pink hər biri 500 min ABŞ dollar olmaqla ümumilikdə 1 milyon dollar vəsait ayırmışdı.
Qeyd edək ki, Avstraliyada hökm sürən irimiqyaslı meşə yanğınlarında bir milyarddan çox heyvan ölüb. Yanğınlar nəticəsində 6 milyon hektar meşə, 2 minə yaxın yaşayış evi və 3 min inzibati və təsərrüfat tikililəri məhv olub. Bundan başqa, yanğında 23 insan, 3 yanğınsöndürən ölüb, 6 insan itkin düşüb.
