“Hörmətli Yeni Azərbaycan Partiyasının üzvləri, hörmətli qonaqlar, xanımlar və cənablar. Bu gün biz Yeni Azərbaycan Partiyasının yaranmasının 30-cu ildönümünü qeyd edirik. Bu münasibətlə Yeni Azərbaycan Partiyasının üzvlərini ürəkdən təbrik edirəm. Partiyamızın yaranması tarixi hadisədir. O vaxt gənc Azərbaycan Respublikası çətin günlər yaşayırdı. Müstəqilliyimizin cəmi bir yaşı var idi və müstəqilliyimizin birinci ili çox ağır keçmişdi. Bəzi hallarda xalqımız böyük faciələrlə üzləşmişdi”.
“Yeni Gundem” xəbər verir ki, bu sözləri Prezident İlham Əliyev Yeni Azərbaycan Partiyasının 30-cu ildönümünə həsr edilən tədbirdə çıxışı zamanı deyib.
“Belə bir vəziyyətdə Azərbaycanın görkəmli nümayəndələri, vətənpərvər, ölkənin gələcəyini düşünən insanlar ölkəmizin nicat yolunu Heydər Əliyevin simasında görürdülər. Məhz buna görə ulu öndərə müraciət ünvanladılar. Bu müraciəti ünvanlayan məşhur “91-lər” öz tarixi missiyasını şərəflə yerinə yetiriblər. Çünki məhz bu müraicət əsasında, bu müraciətə cavab olaraq Yeni Azərbaycan Partiyasının təsis konfransı Naxçıvanda keçirilmişdi. Təsis konfransda ölkəmizin bütün bölgələrindən 500-dən çox nümayəndə iştirak edirdi. Onların tarixi qərarları ölkəmizin yeni səhifəsinin açılmasına gətirib çıxardı. Naxçıvanda keçirilmiş Yeni Azərbaycan Partiyasının birinci təsis konfransı, bir də demək istəyirəm ki, tarixi hadisə idi. Ulu öndərin sədrliyi ilə keçirilmiş bu konfransdan sonra ölkəmizdə yeni siyasi qüvvə yaranmışdır”, – Prezident bildirib.
