“Kişinyovdan da qələbə ilə dönəcəyik” – Millimizin üzvübackend

“Qələbə qazanacağımıza inanırdıq. Komanda şəklində əla oynadıq. Uşaqlar əllərindən gələni etdilər ki, uğur qazanaq. Məncə, yekun istədiyimiz kimi oldu”.

“Yeni Gündəm” xəbər verir ki, bu sözləri futzal üzrə milli komandamızın üzvü Hadi Ahmadi Avropa çempionatının seçmə mərhələsində Moldova yığmasına qalib gəldikləri oyundan (5:1) sonra federasiyanın rəsmi saytına açıqlama verib:

Oyunda həq qol vuran, həm də məhsuldar ötürmə ilə yadda qalan hücumçu hesabın oyuna görə olduğunu bildirib: “Oyunun əvvəlində bir qədər çətinlik çəkdik. Rəqib pressinq edirdi. Ancaq uşaqlar baş məşqçinin tapşırdığı kimi oynadı. Biz qol vurduqca, onlar açılmağa başladılar. Yəni müdafiə olunmağı hücum etməklə əvəzlədilər. Bu da bizim işimizə yaradı. Hesab da oyuna görə oldu”.

Millidə ilk qolunu vuran hücumçu bunu Allahın lütfü hesab edib: “Azərbaycan millisinin forması ilə ilk qolum idi. Bu Allahın bir lütfu, hədiyyəsi oldu. Qələbəni yalnız mənim vurduğum qol qazandırmadı. Komanda olaraq əziyyət çəkdik, mübarizə apardıq və yekunda məqsədimizə nail olduq. Baş məşqçi də mənə daha çox şans verdi”.

Məhsuldar ötürmə ilə də yadda qalan forvard fərqlənməyin daha çətin olduğunu qabardıb: “Qol vurmaq daha çətindir. Həm də həmin anda düzgün qərar qəbul etmək vacibdir. Əgər səndən daha yaxşı mövqedə komanda yoldaşın varsa, niyə ötürmə etməyəsən. Komanda oyununda fərd olaraq özümüzü deyil, kollektivi düşünməliyik”.

Ahmadi cavab oyununa da 3 xal qazanmaq üçün gedəcəklərini deyib: “Səfərdəki oyun daha çətin keçəcək. Rafael Vilela da cəzalı vəziyyətə düşüb və bu görüşdə iştirak etməyəcək. Çətinlik yarada bilər, ancaq digər komanda yoldaşlarım da yaxşı formadadırlar. Bu şəkildə oyunumuzu davam etdirsək, Kişinyovdan da qələbə ilə dönəcəyik və bu yarışı zirvədə başa vuracağıq”.