Sergey Lavrovun mayda planlaşdırılan Yerevan səfərindən sonra birbaşa Bakıya gəlməsi rahat olardı. Lakin o, Moskvaya qayıdıb sonra Bakıya gəlir. Burada müəyyən təkliflərin olmasını ehtimal edirəm. Amma mən Lavrovdan müsbət təklif gözləmirəm. Onun bütün təklifləri Azərbaycanın ziyanına olub.
“Yeni Gündəm” xəbər verir ki, Bunu ARB24-ün “Nə baş verir?” verilişinə açıqlamasında politoloq Elxan Şahinoğlu deyib. O bildirib ki, Lavrov Şuşaya gəlməsi planlaşdırılan Ərdoğanı qapaqlamaq məqsədi ilə belə bir səfər təşkil edib:
“Baydenin qondarma “erməni soyqırımı” barədə açıqlamasından sonra Ərdoğanın dərhal İlham Əliyevə zəng etməsi və birgə addımlar barədə danışıqlar aparılması Rusiyanı qorxudur. Bu səbəbdən Lavrov Ərdoğanı qabaqlamaq istəyir. Onlar Türkiyə Prezidenti Rəcəb Tayyib Ərdoğanın Ramazan ayından sonra planlaşdırılan Şuşa səfərində ciddi təkliflərin olmasından ehtiyat edirlər. Mənim bu təkliflər haqqında müəyyən təsəvvürlərim var. Bunlardan birinin Türkiyənin Şuşada konsulluğunun açılmasıdır.
Rusiya artıq Türkiyənin bölgədəki rolunu qəbul edib. Lakin yenə də Türkiyənin müəyyən planlarından Rusiyadakı ermənipərəst qüvvələr narahatdır. Ancaq nəzərə almaq lazımdır ki, biz artıq seçimizi etmişik. Türkiyə ilə hərbi ittifaqı gücləndirməliyik”.
Ekspert onu da qeyd edib ki, Lavrovun Xankəndində sülhməramlıların paradından bir gün sonra Bakıya gəlməsi də diqqətçəkən məqamlardandır:
“Ola bilsin bu, səfərin məqsədi Bakını sakitləşdirməkdir. Çünki vəziyyət getdikcə gərginləşir. Ermənilərin təxribatı artır, sərhəddə atəşkəsi pozurlar. Vəziyyət o həddə gələ bilər ki, biz antiterror əməliyyatı başlaya bilərik”.
