“Qəzza zolağından olan 1000 fələstinli uşaq və ailələri BƏƏ prezidenti Şeyx Nəhyanın göstərişi ilə ölkədə qəbul olunacaq və onlar sağalıb ölkələrinə qayıdana qədər onların bütün tibbi ehtiyacları və qayğıları göstəriləcək”.
“Yeni Gundem” xəbər verir ki, bu barədə Birləşmiş Ərəb Əmirliklərinin (BƏƏ) prezidenti Şeyx Məhəmməd bin Zayed Əl Nəhyan göstəriş verib.
Xatırladaq ki, İsrailin Qəzzaya hücumları oktyabrın 7-dən bu yana davam edir. İsrailin bölgədə həyata keçirdiyi qırğınlar nəticəsində minlərlə uşaq həlak olub. Bu vəhşiliyi görən və hərəkətə keçən ölkələrdən biri də Birləşmiş Ərəb Əmirlikləri oldu.
BƏƏ-nin rəsmi agentliyi olan WAM-ın xəbərinə görə, BƏƏ prezidenti Əl Nəhyan Beynəlxalq Qızıl Xaç Komitəsinin (BQXK) prezidenti Mirjana Spoljariç ilə telefonla danışıb.
İclasda Qəzza zolağında mülki şəxslərə humanitar və tibbi yardımın intensiv, davamlı və təhlükəsiz çatdırılmasının vacibliyinə toxunulub, zərərçəkənlərin ehtiyacları üçün humanitar yardımın gücləndirilməsi üçün birgə regional və beynəlxalq səylərin məcburi olduğu qeyd edilib.
Əl Nəhyan həmçinin göstəriş verib ki, Qəzza zolağından olan 1000 fələstinli uşaq sağalıb ölkələrinə qayıdana qədər ailələri ilə birlikdə qəbul olunmalı və BƏƏ dövlət xəstəxanalarında ehtiyac duyduqları bütün tibbi və sağlamlıq xidməti ilə təmin olunmalıdırlar.
Bildirilib ki, sözügedən təşəbbüs BƏƏ-nin qardaş Fələstin xalqına, xüsusilə də uşaqlara yaşadıqları çətin humanitar şəraitə cavab olaraq yardım göstərmək səylərinin bir hissəsidir.
Mənbə: Anadolu Agentliyi
Aynur Camal
