Fevralın 24-də Rusiyanın başlatdığı Ukrayna işğalı 100-cü gününə qədəm qoyub. Ukrayna prezidenti Vladimir Zelenski Rusiyanın Ukrayna ərazisinin 20 faizinə nəzarət etdiyini açıqlayıb. Lüksemburqda parlament üzvlərinə videokonfrans vasitəsilə müraciət edən Zelenski qeyd edib ki, müharibənin cəbhə xətti təxminən 1000 kilometr genişlənib. Digər tərəfdən, Rusiya qüvvələri Donbas bölgəsindəki Severodonetsk şəhərinə hücumlarını gücləndirib.
Britaniya müdafiə rəsmiləri bildiriblər ki, Rusiya Severodonetsk şəhərinin böyük hissəsinə nəzarəti ələ keçirib. Luqansk qubernatoru Serhiy Haydai də rus qoşunlarının şəhərin 70 faizinə nəzarəti ələ keçirdiyini açıqlayıb. Bununla belə, Haydai deyib ki, Ukrayna əsgərləri əks-hücuma keçərək düşməni bir çox küçələrdən dəf edib və əsgərləri girov götürüblər.
Şəhərdə davam edən qarşıdurmaların mülki əhalinin təxliyəsini çətinləşdirdiyi də bildirilir.
Videokonfrans zamanı Zelenski döyüşlərin intensivləşdiyi Severodonetskdəki vəziyyətdən də danışıb. Zelenski bildirib ki, Donbasda vəziyyət dəyişməyib, lakin ukraynalılar Severodonetskdə müəyyən qədər qazanc əldə ediblər. Şəhərdə 15 min dinc sakinin olduğu təxmin edilir.
İşğal olunmuş Mariupolda şəhərin keçmiş meri Vadim Boyçenko rus qoşunlarını onlarla əməkdaşlıqdan imtina edən məmurları edam etməkdə ittiham edib. Şəhər Rusiyanın nəzarətinə keçməmişdən əvvəl sərbəst buraxılan Boyçenko onlarla şəhər sakininin həbsxanalarda saxlandığını və işgəncə xəbərləri alındığını iddia edib. Bu iddialar BBC tərəfindən təsdiqlənə bilməyib.
Ötən həftə Boyçenkonun müşaviri CNN-ə bildirib ki, Rusiyanın mühasirəsi və bombardmanı zamanı ən azı 22 min adam həlak olub.
