“Paşinyanın öz maraqları var, Moskvanın ona güvənmədiyini bilir, amma orbitindən də çıxa bilmir”backend

“Ermənistanda qərarvermə mexanizmi mürəkkəbdir, çünki Paşinyan və komandası vəziyyətə tam nəzarət edə bilmir, tək söz sahibi deyil. Maraq qrupları çoxdur, hələ birini də Kreml “Vardanyan” adı ilə təzə oyuna salıb”.

“Yeni Gündəm” xəbər verir ki, bunu ekspert Natiq Cəfərli deyib.

N.Cəfərli bildirib ki, Ermənistan müharibə aparmaq iqtidarında deyil, amma bəlli maraq qrupları, əsas da Moskvadan qidalananlar anlayırlar ki, sülh sazişi indi imzalansa həm Kremlin təsir rıçaqları azalacaq, həm də onların “revanş” hekayəsi bitəcək, ona görə də, məqsəd böyük sülh sazişinin qarşısını almaq, zaman qazanmaq, bununla da həm güclənmək, həm də Moskvanın təsirlərlərini saxlamaqdır: “Paşinyanın da öz maraqları var, Moskvanın ona güvənmədiyini bilir, amma orbitindən də çıxa bilmir, ona görə də hər hadisədə “KTMT”-yə müraciət edir, onlar da təbii, qarışmır, qarışa bilmir, bununla da öz cəmiyyətinə mesaj verir ki, bu ölüvay qurumdan da, Moskvadan da uzaqlaşmaq işində dəstək olsunlar – bu gün Ermənistanda anti-rusiya mövqeyi çox güclüdür və getdikcə güclənir. Azərbaycan sülh istəyir, biz səmimiyik, sülh və yolların tam açılması, iqtisadi əlaqələrin yaranması bizim strateji hədəfimizdir. Azərbaycan hakimiyyəti və müxalifəti sırf bu məsələdə yekcins mövqeyi var deyə, bizdə məhz bu məsələ ilə bağlı xarici oyunçuların daxili oyunbazlıq qurması mümkün olmur, xalq da sülh istəyir. Azərbaycan hökumətinin xarici siyasətdə qurduğu doğru və çixşaxəli ittifaqlar onu deməyə əsas verir ki, Əliyev impulsif davranmır, başqa dövlətin ərazisi ilə bağlı dünyanı tam üstümüzə qaldıra, haqlı olarkən bizi haqsız duruma sala biləcək addımlar atmaz, atmayacaq. Amma, sülhəməcburetmə əməliyyatları da davam edə bilər. Allah Əsgərimizi qorusun, həm də diplomatlarımıza açıq zehn versin ki, sülhəməcburetmə əməliyyatı uğurla, sülhlə, geniş müqavilə ilə bitsin”.