MM-nın Mədəniyyət komitəsinin sədri Q.Paşayeva Qazaxıstanda nümayiş olunan “Qarabağ – geri dönən xoşbəxtliyim” sənədli filminin hazırlanmasında əməyi keçən hər kəsə təşəkkürünü bildirib, bizim hiss və duyğularımızı qardaş Qazaxıstandakı insanlarımıza daha geniş çatdırmaqda bu filmin böyük rol oynayacağına inanırıq deyib.
Qardaş Qazaxıstandan olan jurnalist dostumuz Almas Altayın 44 günlük Azərbaycan Vətən Müharibəsinə həsr etdiyi film bugünlərdə CBC TV-də yayımlandı.
Film qardaş ölkədən olan politoloqlar, jurnalist və bloqerlərdən ibarət 10 nəfərlik heyətin Azərbaycana səfəri, onların Bakı, Bərdə, Gəncə və Şamaxı şəhərlərini ziyarətləri zamanı çəkilən, müharibənin müxtəlif məqamlarını əks etdirən kadrlar, habelə tarixi videogörüntülər əsasında hazırlanıb.
Qardaşımız və Xəzər qonşumuz olan Qazaxıstanlı dostların həm həmkar, həm dost-qardaş olaraq Azərbaycana səfər etmələri xoş idi və şadam ki səfər əsnasında bizimlə də görüş nəzərdə tutulmuşdu. Dostlarımız görüş zamanı bizim fikirlərimizi də almışdı və məmnuniyyətlə bildirmək istərdim ki, filmdə bizim fikirlərə də yer verilib.
“Qarabağ – geri dönən xoşbəxtliyim” filmi ilə tanışlıq aydın şəkildə göstərir ki müəllif mövzuya yalnız qardaşlıq duyğuları ilə yanaşmayıb, məhz haqq-ədalət mövqeyindən və peşəkar yanaşma ilə çıxış edib. Bu, qardaş ölkədə, öz mövzusu üzrə, qazax və rus dillərində çəkilən ilk belə əhatəli sənədli film olma özəlliyinə malikdir. Film artıq Qazaxıstanın Nur-Sultan və Almatı şəhərlərində sənətsevərlərə təqdim olunub.
Fürsətdən istifadə edib, qardaş ölkə yeni nəsil aydınlarının ölkəmizə səfərini təşkil etmiş Almatı şəhərindəki Azərbaycan icmasına və Azərbaycanın Qazaxıstandakı səfirliyinə könül dolusu təşəkkür edirəm. Əlbəttə, ekran işinin süjet xəttinin öz ardıcıllığı, dinamikası ilə seçildiyinə, bizim həqiqətlərimiz haqqında geniş ictimaiyyətə dəqiq və dolğun bilgilər çatdırdığına görə, müəllifə, filmdə əziyyəti olan hər kəsə xüsusi minnətdarıq.
