“Taliban” radikal hərəkatı Əfqanıstan Hərbi Hava Qüvvələrinə məxsus vertolyotu vurduqlarını iddia edib.
“Yeni Gündəm” xəbər verir ki, bu haqda məlumatı “Taliban” hərəkatının nümayəndəsi Zabihullah Mücahid öz tviter hesabında açıqlayıb.
Onun sözlərinə görə, hadisə Qilmənd əyalətində Nad-e Ali bölgəsinin mərkəzinə yaxın ərazidə baş verib. O, həmçinin əlavə edib ki, “Taliban” döyüşçüləri tərəfindən Nad-e Ali bölgəsinin mərkəzi və polis rəisi ələ keçirilib.
Lakin KİV-in məlumatına görə, Əfqanıstan Hərbi Hava Qüvvələrinə məxsus vertolyot Qilmənd əyalətində qəza enişi edib. Ölkə ordusunun məlumatına görə, vertolyot “Taliban”a qarşı əməliyyat zamanı qəza enişi edib və bunun texniki səbəblərdən baş verdiyi bildirilir. Bundan başqa, insident zamanı xəsarət alanların olmadığı bildirilir. Qeyd olunur ki, ekipaj təxliyyə olunduqdan sonra vertolyot məhv edilib.
Qeyd edək ki, hazırda ölkədə hökumət qüvvələri ilə “Taliban” hərəkatı döyüşçüləri arasında qarşıdurmalar davam edir. Xarici ölkələrin öz qüvvələrini Əfqanıstandan çıxarması ilə “Taliban” döyüşçüləri öz fəaliyyətlərini daha da aktivləşdirir. KİV-in məlumatına görə, “Taliban” artıq ölkənin 100-dən çox bölgəsinə nəzarəti ələ keçirib.
