Bakının Xətai rayonunda yollarda aparılan təmir işləri narazılıqla qarşılanıb.
“Qafqazinfo”ya müraciət edən Məzahir Rüstəmov küçəsinin sakinləri bildiriblər ki, yolda aparılan daralma nəqliyyatın hərəkətini daha da iflic edəcək: “Yolun təxminən 1 kilometr hissəsi hər tərəfdən 1metr daraldılır. Bu küçədə 2 məktəb, 2 lisey var. Valideynlər uşaqlarını dərsə gətirərkən maşını saxlayanda bu yolda hərəkət tamam dayanacaq. Çünki yalnız hərəkət üçün iki zolaq alır, dayanıb kimisə düşürtməyə yer qalmayıb. Yaxın vaxtlarda da rayon icra hakimiyyəti səkini təmir edərək abadlaşdırmışdı”.
Azərbaycan Avtomobil Yolları Dövlət Agentliyinin mətbuat katibi Anar Nəcəfli “Qafqazinfo”ya bildirib ki, həmin yolda təmir işləri Bakı Nəqliyyat Agentliyinin sifarişi ilə həyata keçirilir.
BNA-nın sözçüsü Mais Ağayev isə bildirib ki, yenidən qurulan və ya əsaslı təmir olunan küçələrlə bağlı layihə hazırlanan zaman diqqət yetirilməli olan ən vacib məqam piyada təhlükəsizliyi ilə bağlıdır: “Bu ünvanda da layihə hazırlanan zaman piyada təhlükəsizliyi əsas faktor olaraq götürülüb. Digər bir yandan piyada təhlükəsizliyi ilə bağlı tədbirlər görülməsi yolun daralmasına səbəb olmur. Orda avtomobillər üçün olan hərəkət zolaqlarının parametrləri norma daxilində, hətta bir qədər artıqdır. Bundan əlavə qeyd edilən küçədə nəqliyyat vasitələri üçün parklanma yerləri də təşkil olunacaq”.
Murad Əhməd
