Türkmənistan Beynəlxalq Hava Yollarının Təhlükəsizlik Şurası ölkənin bütün daşıyıcılarının İran hava məkanının istifadəsini müvəqqəti olaraq dayandırmaq qərarına gəlib.
“Yeni Gündem”in xəbərinə görə, qərar Türkmənistan mülki aviasiyasının uçuşlarının təhlükəsizliyini təmin etmək məqsədi ilə verilib.
Qeyd edək ki, bundan öncə İranın ABŞ-ın İraqda yerləşən hərbi bazalarına raket hücumundan sonra dünyanın bir sıra iri beynəlxalq aviaşirkətləri bu ölkəyə və onun üzərindən uçuşları dayandırıb.
Məlum olub ki, dünyanın aparıcı aviaşirkətləri İrana uçuşları dayandırıb və İraq və İran hava məkanında uçuşların qarşısını almaq üçün təyyarələrinin marşrutlarını dəyişdiriblər. Bura “Air France”, “Emirates Airline”, “Singapore Airlines”, “Malaysia Airlines”, “American Airlines”, “Delta”, “Lufthansa” və digərləri daxildir.
ABŞ Federal Aviasiya Administrasiyası döyüş tipli təyyarələr istisna olmaqla, digər Amerika təyyarələrinin İraq, İran, Körfəz və Oman üzərindəki hava məkanlarında uçuşunu qadağan edən bir bildiriş yayıb.
Federal Hava Nəqliyyatı Agentliyi də Rusiya aviaşirkətlərinə İran və İraqın hava məkanlarından istifadə etməməyi və Fars və Oman körfəzləri üzərindən uçmamağı tövsiyə edib.
Xatırladaq ki, yanvarın 8-də Ukraynanın “Boeing 737” təyyarəsinin Tehranın hava limanının yaxınlığında qəzaya düşməsi nəticəsində 167 sərnişin, 9 ekipaj üzvü həlak olub. Onlardan 82-si İran, 63-ü Kanada, 11-i Ukrayna, digərləri isə İsveç, Əfqanıstan, Almaniya və İngiltərə vətəndaşları olub.
