Baxmut, Avdiyvka və Marinka yaşayış məntəqələri uğrunda şiddətli döyüşlər davam edir.
“Yeni Gundem” xəbər verir ki, bu barədə Ukrayna Silahlı Qüvvələrinin Baş Qərargahı məlumat yayıb.
Ötən sutka ərzində Ukrayna Müdafiə Qüvvələri düşmənin 4 istiqamətdə 69 hücumunu dəf edib .
“Düşmən əsas səylərini Liman, Baxmut, Avdiivka və Marinka istiqamətlərində hücum əməliyyatları keçirməyə cəmləməkdə davam edir. Ukrayna Müdafiə Qüvvələrinin bölmələrinin koordinasiyalı fəaliyyəti və hər bir əsgərin qəhrəmanlığı sayəsində son sutka ərzində işğalçıların 69 hücumu dəf edilib. Baxmut, Avdiivka və Marinka yaşayış məntəqələri uğrunda qızğın döyüş davam edir”, – Baş Qərargahdan bildiriblər.
Agentliyin məlumatına görə, Baxmut istiqamətində rəqib Baxmut şəhərini tam nəzarətə götürməyə çalışır və ora hücuma davam edir.
Bundan əlavə, Baş Qərargahın məlumatına görə, Rusiya qüvvələri ötən gün ərzində 3 raket və 21 hava hücumu həyata keçirib və çoxsaylı raket sistemlərindən 33 dəfə atəş açıb.
Ukrayna qüvvələrinə gəlincə, Baş Qərargah bildirir ki, son 24 saat ərzində Ukrayna aviasiyası işğalçıların şəxsi heyəti və hərbi texnikasının cəmləşdiyi ərazilərə 5 zərbə endirib, həmçinin düşmənin kəşfiyyat xarakterli pilotsuz uçuş aparatını vurub. Raket və artilleriya bölmələri düşmənin canlı qüvvəsinin toplandığı əraziyə zərbələr endirib.
Fərahim Rəhimov
