Azərbaycan Prezidenti İlham Əliyevin son müsahibə və çıxışlarını bir kəlmə ilə xarakterizə etmiş olsaq, bunu belə adlandırmaq olar: güzəştsiz milli mövqe! Onun noyabrın 12-də Bakıda BMT-nin İqlim Dəyişmələri üzrə Çərçivə Konvensiyasının Tərəflər Konfransının 29-cu sessiyasının (COP29) Liderlər Sammitinin açılış mərasimindəki çıxışı və son iki müsahibəsi – dekabrın 18-də Kiselyova verdiyi müsahibə, dekabrın 29-da Heydər Əliyev Beynəlxalq Aeroportunda Azərbaycan Televiziyasına müsahibəsi zamanı sərgilədiyi qətiyyət dövlət başçısının Azərbaycanın mövqeyini və maraqlarını prinsipiallıqla müdafiə etməsinin bariz nümunəsidir.
İlham Əliyev hər zaman sülhün tərəfində olduğunu bəyan edib. Çıxışları hər zaman, sülhə, barışığa dəvət çağırışları ilə zəngindir. Bunu sübut etmək üçün elə son il Azərbaycanın ev sahibliyi etdiyi və böyük çətinliklər, təhdidlər qarşısında uğurla reallaşdırdığı COP29 kimi mötəbər tədbiri qeyd eləmək kifayətdir. Bu, yalnız ölkənin deyil, bəşəriyyətin sabahını düşünməkdən irəli gələn müqtədir addım idi.
Buna baxmayaraq, hər hansı milli təhlükə, təhdid anında Prezident İlham Əliyevin mövqeyi tamam sərt şəkil alır. Qətiyyətli, hökmlü, azad, prinsipial! Hər çıxış və müsahibəsində İlham Əliyev Azərbaycanın öz suverenliyini və ərazi bütövlüyünü müdafiə etmək hüququnun olduğunu vurğulayır, “Xarici siyasətinin xüsusiyyətlərinə görə istər Qərbdə, istərsə də Şərqdə Azərbaycan müstəqil xarici siyasət yürüdən tamamilə müstəqil aktor kimi qəbul edilir. Həm də ona görə ki, bu, eyni zamanda, həm Rusiyanın, həm də NATO üzvü Türkiyənin müttəfiqi olan yeganə ölkədir. Dünyada ikinci belə ölkə yoxdur”.
Bu gün İlham Əliyevin qətiyyəti, əzmi bütün dünya üçün örnəkdir. Hərçənd, dünya belə qətiyyətli, güclü lider obrazını, xüsusilə prinsipial, həm milli maraqları, həm də beynəlxalq dəngələri qoruyan idarəedicini o qədər də asan qəbullana, həzm edə bilmir. Amma olsun, onsuz da başqa yolları yoxdur. İlham Əliyev bu gün min cür mürəkkəb, xaotik, gizlin, məkrli siyasi oyunların çevrəsində Azərbaycanın mənafeyini uca tutur və bütün siyasi-ictimai aşamalardan zədəsiz keçirir. Prezidentin bu gün yürütdüyü siyasətin əsasında 44 günlük Vətən müharibəsindən sonra yaranmış yeni reallıqlar dayanır. Bu reallığı ölkə başçısı özü yaradıb. Və israrlı şəkildə, ölkəsinin milli mənafeyinin, suverenliyin qorunmasında istənilən müdaxilələri minimuma endirməyi bacarır. Bu gün bir çox dövlətlərin Azərbaycana qarşı təzyiqlərinin kökündə dayanan amillər də məhz, bundan zəmin alır. Prezidentin müsahibə və çıxışlarında dönə-dönə qeyd etdiyi kimi, Azərbaycanın müstəqil siyasət yürütməsi, beynəlxalq aləmdə artan nüfuzu, söz sahibi olması, etimad göstərilən dövlətə çevrilməsi reallığı. Bütün zamanlarda özünü supergüc, hegemon statusunda hiss edən və etdirməyə çalışan dövlətlərə sərf eləmir: “Onlar kiminsə onlara ədalət öyrətməsinə alışmayıblar. Onlar öyrəşiblər ki, hamıya özləri dərs versinlər. Onlar alışıblar ki, qarşılarında baş əyirlər, müəyyən məsələlərdə onlardan xahiş edirlər, onlarla məsləhətləşirlər, onların icazəsi olmadan heç nə etmirlər. Beləcə keçmiş kolonial, indi isə bəzi neokolonial ölkələr bu tərzdə yaşamağa və düşünməyə alışıblar. Bu, onların şüurunda dərin kök salıb”.
Bu gün dünyada öz siyasi ambisiyası, mənfəəti naminə xalqının qanı və müsibətini tərziyə qoymağa hazır olanlar var. İlham Əliyev isə heç zaman xalqın fəlakəti ilə ehtikarlıq etməyib. Hətta milli intibah naminə belə millətin taleyi ilə oynamayıb. Şərəf və suverenliyi, humanizm və insaniyyəti liderlik fəaliyyətinin ana xəttinə çevirib. Onun müasir dünyaya yeni, qərəzsiz baxışla baxmağının əsas qayəsi elə buradan qaynaqlanır. İlham Əliyev göstərir ki, öz dövlətinin, öz millətinin mənafeyini prioritetə çevirəndə, onun dəyərlərinə hörmət edəndə, digər xalqlara, dövlətlərə də rəqib və ya istismar obyekti kimi baxmırsan, onlara məxsus olan dəyərlərə etinasız yanaşmırsan. Bu əxlaq siyasətini öz tərcümeyi-hallarına çox az dövlət başçısı yazdırmağa müvəffəq olub. Bunu bacarmayanda əxlaq dağıdılıb, prinsiplər pozulub, ləyaqətsiz üsullara haqq qazandırılıb, saysız-hesabsız insan ölümə məhkum edilib. İlham Əliyevin son müsahibə və çıxışlarında ehtiva etdiyi amillər – dünyagörüşünün qlobal xarakteri, bəşəriyyət qarşısında məsuliyyət hissi, eyni zamanda milli mənafenin hər şeydən uca tutulması amili onun ehtiva etdiyi ən ali dəyər, mənəvi-əxlaqi keyfiyyətlər məcmusu kimi müstəsnadır. Prezident İlham Əliyev bütün cəbhələrdən ölkəmizə uzanmış əl, dil, silah müdaxilələrini dəf etməyə çalışaraq Azərbaycanın milli varlığını qorumaq amalına layiqincə xidmət göstərir. Xalqın tarixini və taleyini növbəti səhvlərdən qorumaq üçün sağlam mənəvi iqlim yaradır və bu işdə bütün milli-siyasi-intellektual potensialı ilə birlikdə dayanır. Məsələn, elə son faktlardan biri, Prezident İlham Əliyevin təyyarə qəzasından bir neçə gün sonra AZ TV-yə verdiyi müsahibə qəzanın təfərrüatlarının araşdırılması ilə bağlı göstərdiyi prinsipiallıq və dürütlük dediklərimizə sübutdur: “Qəzanın təfərrüatları tam araşdırılacaq. Bundan mənim şübhəm yoxdur. Onu da bildirməliyəm ki, Azərbaycan ilk gündən beynəlxalq ekspertlərdən ibarət qrupun bu işlə məşğul olmasının tərəfdarı idi. Rusiya tərəfi rəsmi qaydada bizə təklif etmişdi ki, Dövlətlərarası Aviasiya Komitəsi bu işi araşdırsın. Biz isə qəti şəkildə bundan imtina etdik. Səbəb də aydındır. Çünki sirr deyil ki, bu qurum daha çox Rusiya məmurlarından ibarətdir və qurumun başında Rusiya vətəndaşları dayanır. Burada obyektivlik amilləri tam təmin edilməyə bilərdi. Əgər qəza baş verəndən dərhal sonra biz Rusiya tərəfindən ədalətli və adekvat addımlar görsəydik, bəlkə də buna etiraz etməzdik. Amma biz gördük ki, burada məsələni ört-basdır etmək cəhdləri göz qabağındadır”…
Bu fikirlər həm ümumi müşahidələrin doğru-dəqiq analizi, həm də ölkə maraqlarının, milli mənafenin qorunmasının əməli ifadəsi idi. İlham Əliyevin dövləti idarəetmə strategiyasında, düşüncə tərzində və siyasi üslubunda bu amil prioritetdir. Onda yüksək bəşərilik yüksək milliliklə vəhdətdə təzahür edir. Həm göstərir ki, Azərbaycan bütün ölkələrlə qarşılıqlı səmərəli əməkdaşlığa, etimada əsaslanan siyasət qurur və inkişaf etdirir. Eyni zamanda, sübut edir ki, heç bir qüvvə, güc mərkəzi Azərbaycan dövlətinin iradəsinə təsir göstərə və yolundan döndə bilməz. Belə bir diplomatik səriştə, meyarlarına sadiqlik bu gün İlham Əliyevin varislik haqqına tapınaraq ehtiva etdiyi ən böyük dəyər olmaqla yanaşı bügünkü uğurlarımızın genetik kodlarını daşıyan amillərdir. Gündən-günə yeniləşən, Qərbdən Şərqə gedən yolların qovşağında hər gün daha da çox mərkəz, görüş, ünsiyyət məkanı rolunu oynayan, bəşəriyyətin taleyini düşünən ictimai-siyasi, tarixi-mədəni, qlobal, milli və multikultural ideyaların, ideologiyaların, müzakirə və tədbirlərin əsl sınaq meydanına çevrilən Azərbaycanın obrazı İlham Əliyevin müdrik zəkasında həm də milli mənafenin, ölkə süverenliyi və maraqlarının hər şeydən uca tutulmasının qayəyə çevrilməsi ilə yeni status və nüfuz qazanır.
Elnarə Akimova
Milli Məclisin deputatı, YAP İdarə Heyətinin üzvü, filologiya elmləri doktoru
