“Mən evə bağlı insanam. Hazırda tətbiq olunan karantin rejimi mənə elə bir depressiv təsir etmir. Çünki işim bitən kimi evdə olan insanam. Evdə də özümə elə şərait qurmuşam ki, rahat oluram”.
“Yeni Gündəm” xəbər verir ki, bu sözləri Xalq artisti Aygün Kazımova İTV-də yayımlanan “Gəl, qonaq ol” proqramının virtual qonağı olarkən bildirib.
Məşhur müğənni xüsusi karantin rejimində qızı İlqarə və iki iti ilə birgə evdə qaldığını, idmanla məşğul olduğunu qeyd edib:
“Bilirsiniz ki, səhnəyə gəlməzdən öncə idmanla məşğul olmuşam. Evdə idman alətlərim var. Evdə qızım və iki gözəl itim var. İtlərimi də qızım kimi sayıram. Onlara heyvan kimi baxmıram. Bir şəxsiyyət hesab edirəm. Hər birinin xasiyyəti var.
Karantin bizə özümüzü, həyatımızı düşünmək üçün çoxlu vaxt verdi. Vaxt olmurdu ki, insan özünü analiz etsin. Elə bir qrafikdə işləyirik ki, buna vaxtımız olmurdu. İndi etdiklərimi düşünürəm və xasiyyətimi analiz edirəm. Bu olanlardan ancaq pozitiv şeylər götürürəm”.
Daha sonra Kazımova görüntülü şəkildə səhər idmanı edib. Aparıcı Saleh Bağırov ona Xalq artisti Tünzalə Ağayevanın yıxıldığını eyham edərək, diqqətli olmağı tövsiyə edib.
Pop ifaçısı isə “Narahat olmayın, bu vəziyyətdən çıxmaq ancaq mənə aiddir. Yıxılıb durmağın öz ləzzəti var”, – deyə qeyd edib.
