Qarşıdan gələn bələdiyyə seçkiləri bu Kürsünün “dadı damağında qalan” bir çox hazırkı bələdiyyə sədrlərini hərəkətə gətirib.İllərdir kağız üzərində “tər töküb” sərvətlər toplayan sədrlərin bir qismi vəzifə borclarını unudub, bir qismi isə ümumiyyətlə vəzifə səlahiyyətlərinin nələrdən ibarət olduğunu belə bilmirlər.
Torpaq satmaq, küçələrə xırda daş səpib “küçə təmiri” adı altında hesabdan pul silmək, bələdiyyəyə aidiyyatı olan – olmayan ərazilərdən vergi toplamaq, ölü yaxınlarına məzar yeri satmaq və digər işlərlə özünə sərvət yığan sədrlər bu gün “əlim yandı”da imza toplamaqla məşğuldurlar. Təbii ki, bütün bu məsələlərdə onların ən böyük “yardımçıları və himayədarları” aid olduqları rayonların icra başçılarıdır. Məhz bu səbəbdəndir ki, yerlərdə bələdiyyə sədrlərinin böyük əksəriyyəti icra başçısının yaxın adamları olurlar.
Yeri gəlmişkən, icra başçısına yaxın olan belə bələdiyyə sədrlərindən biri də Mingəçevir şəhər icra hakimiyyətinin başçısı İlham İsmayılovun kirvəsi olduğu deyilən, şəhər bələdiyyəsinin sədri Ramiz Əliyevdir.
Xatırladaq ki, bir müddət əvvəl haqsız yerə işindən azad edildiyini deyən keçmiş bələdiyyə üzvü Fərhad Abdullayev adlı şəxs mediaya məktubunda Ramiz Əliyevin yazıb-oxumağı belə bacarmadığını, şəhərin “Əli qəbristanlığı” deyilən böyük qəbristanlığında köhnə qəbr yerlərini belə satışa çıxardığını, bütün iclaslarında onu bələdiyyə sədri vəzifəsinə gətirdiyi üçün icra başçısına təşəkkür etdiyini iddia edirdi.
Qanunla seçki – səsvermə yolu ilə güya seçilən bələdiyyə sədrinin kirvəsi İlham İsmayılova təşəkkür etdiyi barədə deyilənlər elə onun bu vəzifə üçün nə dərəcədə uyğun biri olduğunun aşkar nümunəsi idi.
İdman müəllimliyindən icra başçısının müavini vəzifəsinə qədər qalxan Ramiz Əliyevin həmin vəzifədən o, zamankı icra başçısı Niyazi Bayramovdan xəbərsiz məktəblərdən “xərac” topladığına görə qovulduğu deyilir. O, “gəlişi ilə ona günəşi gətirən” kirvəsi İlham İsmayılovun sayəsində yenidən vəzifə kürsüsündə əyləşmə xoşbəxtliyinə nail olur. Elə gələr-gəlməz də köhnə iş yeri MKTİB-də “qara işləri”ndə onun köməkçisi və mühasibi olmuş, orta təhsilli, pensiya yaşına çatmış Yeganə Hüseynovanı bələdiyyəyə baş iqtisadçı, qohumu, orta təhsilli İsgəndər Yusubovu isə “Vergi və ödənişlər” şöbəsinə müdir təyin edir. Çünki, bu cür. “təcrübəli işçilər”lə işləmək ona daha rahat idi.
Bu dəfə isə vəziyyət başqadır. Son illər qanunda olan bəzi dəyişikliklər və nəzarətin gücləndirilməsi Ramiz müəllimi təşvişə salıb. Seçkiqabağı o, qədər həyəcan keçirir ki, həyəcandan danışığını, davranışını belə itirib.
Özünü “təmizə çıxarmaq” həvəsi ilə media dəvət edib, dərsinə yaxşı hazırlaşmayan uşaqlar kimi udquna-udquna ondan gileylənən müharibə veteranını dolayısilə “əxlaqsız”, “avara” adlandırır, ailəsindən boşandığını deyir.
Ancaq, veteranın ailəsindən boşanmasının, onun bələdiyyə sədrinin qanunsuz torpaq satdığı barəsindəki açıqlaması ilə əlaqəsi olmadığı kimi, idman müəlliminin də bu vəzifəyə aid olmadığı, şair Qabil demişkən, yerinin səhv düşdüyü, zorla qurduğu gülünc cümlələrin hər kəlməsindən aşkar görünür.
Bütün istedad və bacarıqlarını səfərbər edərək, qarşıdan gələn bələdiyyə seçkilərinə hazırlıq görən sədr 2020-ci illərin “yeni piar metodu”nu da gözardı etməyib. Şəhidin anası ilə adını belə bilmədiyi şəhidin məzarı önündə fotosessiya edib, reportaj hazırlatdırmaqla cəmiyyət arasında güya “hər zaman onlara diqqət və qayğısını əsirgəmədiyi” fikrini aşılamağa çalışır.
Amma, artıq gecdir, Ramiz müəllim. Sizin önünüzə qalxan kimi verdiyiniz şəhid ailələrinə diqqətiniz, “avara” dediyiniz canlı şəhidə – müharibə veteranına qarşı münasibətinizdən bəllidir. Bu işlər ört-basdır etdiyiniz avtomobil qəzasına bənzəməz, hər halınızdan, hər kəlmənizdən büruzə verir.
Elə məsəlidir, “Əli yanan ağzına təpər”.
Redaksiamıza yerli sakinlər tərəfindən verilən məlumata görə, indi də Ramiz Əliyev üçün “əlimyandı” imza toplanır. Belə ki, yerli icra hakimiyyətləri tərəfindən bütün seçkilərdə və tədbirlərdə işləri bahasına “əl buyruqçusu” yerinə qoyulan kommunal işçiləri bu dəfə də Ramiz Əliyev üçün imza atmağa məcbur edilir. Sakinlərin sözlərinə görə illərdir nəinki sakinlərə heç bir xeyri dəymədiyindən, hətta insanlarla kobud və özündənrazı davranışlarından narazı olduqları üçün imza atmaq istəməyən kommunal işçiləri, kirvənin əmrindən çıxmağın, onlar üçün işlərini itirmə bahasına başa gələcəyindən qorxduqları üçün, “ağanın əmrilə dərəyə sürməyə” vadar edilirlər.
İlham İsmayılovun kirvəsi üçün göstərdiyi səylərin nəticəsi yanvar ayının 20-dən sonra bəlli olacaq. O, zamana qədər isə biz Ramiz Əliyevi bugünə qədərki fəaliyyətilə silsilə məlumatları təqdim edərək, həm Mingəçevir sakinləri, həm də aidiyyatı qurumlarla tanış etməkdə davam edəcəyik.
Yeri gəlmişkən, bir zamanlar barəsindəki məlumatlarla bağlı mövqe bildirməkdən yayınan, həqiqətləri dərc etdiyimizə görə bizi məhkəmə ilə hədələyən, 10 cümləlik təhdid məktubunda 20-dən çox hərf və söz səhvi edən bələdiyyə sədri barəsində yeni məlumatlarımız olacaq.Bizi izləməkdə davam edin.
Redaksiamız hər kəsin söz haqqını tanıyır.DogruXeber.az
