Tanınmış müğənni Nura Suri ölkə başçısı və xanımına mart ayından etibarən işsiz qalanlar adından müraciət edib.
“Yeni Gündəm” müğənninin müraciətini təqdim edir:
“Hörmətli cənab Prezident İlham Əliyev və Birinci vitse-prezident Mehriban Əliyeva, mart ayından etibarən işsiz qalmışıq. Düşünürdük ki, iyunda hər şey normala dönəcək. Bu müraciət tək müğənnilər və musiqiçilərə görə deyil. Ümumilikdə bütün şadlıq saraylarında, restoranlarda çalışanlar (ofisiantlar, xadimələr, aşpazlar və s.) gözəllik salonları, geyim mağazaları, avtomobil kirayəsi (gəlin aparmaq üçün), gül mağazaları, texniki avadanlıqlar, bazarlarda çalışanlar və bilavasitə işləri toylara bağlı olan günəmuzd işləyənlərin adındandır… İşləri toy sektoruna bağlı olan hər kəsin işi dayanıb və gəliri yoxdur. Kiminsə maşını, evi var, amma martdan indiyədək qazancı yoxdur. Bu insanlar necə dolansın? Onlara da 190 manat yardım düşmür. Hər şey dayanıb. Avqustun sonunda isə Məhərrəmlik ayı girir. Daha iki ay iş olmayacaq. Hələ payızda ikinci dalğanın olacağı bildirilir. Bu qədər insan təkrar işsiz qalacaq. Bizim sağlamlığımızı düşünərək verilən qərarlar o biri tərəfdən bizə maddi çətinlik yaradır. Biz müğənnilər bütün dövlət tədbirlərində iştirak edirik, xeyriyyə işləri görürük. Hər zaman dövlətimizin yanındayıq. Xalq artistindən tutmuş ən sıravi müğənnisinədək öz hesabına ən ucqar rayonlara konsertlərə gedir. Vaxtilə bununla bağlı pul ayrılsa belə, həmin ödənişlər ifaçılara çatmayıb. Biz dövlətimizin adı olan yerdə maddi maraq güdməmişik. Həmişə dövlətimizə, millətimizə yararlı olmaq istəmişik. Bir neçə iş sahəsi də musiqiçilərə, müğənnilərə bağlıdır. Buradan menecerlər, prodüsserlər, gözəllik salonları, atelyeler, mağazalar və digər yerlər də evinə çörək pulu aparır. İyunadək birtəhər keçinənlər var idi. Düşünülürdü ki, iyunda hər şey bitəcək. Lakin bu müddət uzadılsa, krediti olan sənətçilər, onlarla işçinin evinə maaş verən musiqiçilərin halı necə olacaq? Eləsi var ki, xəstə anasına yardım etmək üçün banka girib, pulları necə qaytarsın? Həmçinin, 5 ay çalışmamaq növbəti 5 ay ərzində də maddi sıxıntılar çəkməklə nəticələnəcək. Banka borcu olanların faizləri yüksələcək, zəncirvari bir-birinə bağlı olan şəxslər də istəmədən bir-birinə maddi zərər vurmuş olacaq. Həmçinin, bu, iqtisadiyyatımıza da ziyandır. Yuxarıda da qeyd etdiyim kimi, bu müraciət təkcə mənim adımdan yox, bütün bu sahədə çalışan insanların adındandır”.
