Xəbər verdiyimiz kimi, Prezident İlham Əliyevin imzaladığı sərəncamla Alı İbrahim oğlu Qocayev Samux Rayon İcra Hakimiyyətinin başçısı vəzifəsindən azad edilib.
“Yeni Gundem” vəzifəsindən azad edilən A.Qocayevlə bağlı məlumatları təqdim edir:
Alı Qocayev 27 iyul 1947-ci ildə Qazax rayonunun Çaylı kəndində anadan olub. O, 1965-ci ildə Çaylı kənd orta məktəbini, 1974-cü ildə isə M. Əzizbəyov adına Neft və Kimya İnstitutunun elektrik intiqalı və sənaye qurğularının avtomatlaşdırılması fakültəsinin axşam şöbəsini bitirib.
Əmək fəaliyyətinə 1976-cı ildə Bakı Radio Zavodunda elektrik montyoru kimi başlayıb. 1968–1992-ci illərdə “Bakı Su Kəməri” İdarəsində mühəndis-texniki heyətin tərkibində müxtəlif vəzifələrdə işləyib, 1992–1997-ci illərdə isə idarə rəisi vəzifəsində fəaliyyətini davam etdirib.
1997–2000-ci illərdə “Abşeron Regional Səhmdar Su” Cəmiyyətinin vitse-prezidenti, 2000–2004-cü illərdə Bakı Şəhər İcra Hakimiyyəti Bakı Kanalizasiya İstehsalat Birliyinin baş direktoru, 2004–2005-ci illərdə isə “Azərsu” Açıq Səhmdar Cəmiyyətinin vitse-prezidenti, 2005–2012-ci illərdə isə Bakı şəhəri Binəqədi Rayon İcra Hakimiyyətinin başçısı vəzifələrində çalışıb. Azərbaycan Respublikası Prezidentinin 18 aprel 2012-ci il tarixli Sərəncamı ilə Samux Rayon İcra Hakimiyyətinin başçısı təyin edilmişdi.
A. Qocayev 2001-ci ildən Yeni Azərbaycan Partiyasının üzvüdür, ailəlidir, üç övladı, yeddi nəvəsi var.
