Sentyabrın 25-də Azərbaycan Milli Xalça Muzeyində mərhum millət vəkili Qənirə Paşayevanın xatirəsinə həsr olunmuş “Qənirə Paşayeva – İTHAF” adlı bədii sərginin açılış mərasimi keçirildi. Bu sərgi, Qənirə xanımın həyatına və irsinə olan dərin sevgi və hörmətin bir ifadəsi olaraq təşkil edildi.
“Yeni Gundem” xəbər verir ki, tədbirdə ailə üzvləri, dostları və bir çox tanınmış mədəniyyət xadimləri, onu sevənlər bir araya gələrək, Qənirə xanımın xatirəsini bir daha yad etdilər. Sərgi ziyarətçilərə onun həyatının müxtəlif anlarını, mübarizələrini və insanlara olan dərin sevgisini xatırlatdı. Qənirə xanımın ruhu burada, bu məkanın hər küncündə hiss olunurdu. Onun sevgi dolu xatirələri, müsbət enerjisi və insanlara göstərdiyi qayğı, hər birimizin qəlbində yaşayır.
Bu sərgi, sadəcə bir xatirə deyil, eyni zamanda onun irsinin yaşadılması, gənc nəsillərə ilham verilməsi məqsədini güdür. Qənirə xanımın insanlara olan sevgisi, cəmiyyətə xidmət edərək, onun dəyərlərini yaşatmaq arzusu, bu gün də bizə istiqamət verir.
Sərgidəki hər bir əsər, onun həyat yolunun bir parçasını əks etdirir, onu daha yaxından tanımaq imkanı yaradır. Qənirə xanım, əziz xatirəsi ilə hər zaman qəlbimizdə yaşayacaq. Onun irsinin və dəyərlərinin yaşadılması, bizlərin borcudur. Bu sərgi, onun xatirəsini əbədiləşdirmək, unutulmaz anlarını bir daha canlandırmaq üçün əhəmiyyətli bir addımdır.
