Tarixin hər dövründə xalqları birləşdirən, onların iradəsini gücləndirən əsas amillərdən biri qələbələr olub. Hər bir qələbə təkcə düşmən üzərində əldə edilmiş zəfər deyil, həm də milli birlik, həmrəylik və qürur simvolu kimi tarixə yazılır. Azərbaycan xalqı üçün də belə bir zəfər, Qarabağın işğaldan azad edilməsi ilə nəticələnən Vətən müharibəsidir. Bu qələbə həm tarixi ədalətin bərpası, həm də xalqımızın birliyinin gücünü sübut edən unikal bir hadisə kimi yadda qaldı.
Qarabağ müharibəsi yalnız torpaqların azad edilməsi mübarizəsi deyildi. Bu, həm də milli qürurun, ləyaqətin bərpası uğrunda bir savaş idi. Uzun illər işğal altında qalan torpaqların azad olunması arzusu hər bir azərbaycanlının qəlbində yanırdı. 2020-ci ilin payızında başlayan müharibə isə xalqın bu arzusunun gerçəkləşməsi üçün bir dönüm nöqtəsi oldu.
Xalqın vəhdəti, ordunun fədakarlığı və rəhbərliyin müdrikliyi bir-birini tamamlayaraq bu tarixi zəfəri mümkün etdi. Azərbaycan xalqı bir yumruq kimi birləşərək, dünyaya iradə və gücünü nümayiş etdirdi. Bu birliyin ən bariz ifadəsi isə Prezident İlham Əliyevin “Dəmir yumruq” ifadəsində əksini tapdı. Bu yumruq təkcə düşmənə qarşı deyil, həm də daxildəki birlik və həmrəyliyimizin rəmzi idi. Vətən müharibəsində Azərbaycanın güclü ordusu ön cəbhədə döyüşür, arxa cəbhədə isə xalq bu mübarizəni dəstəkləyirdi. Əsgərlərimiz canlarını fəda edərək, torpaqlarımızı azad edir, xalq isə həm mənəvi, həm də maddi dəstəyi ilə bu mübarizədə iştirak edirdi. Bu birlik sayəsində Azərbaycan Ordusu tarix yazdı. Əsgərlərimiz düşmənin illərlə qurduğu müdafiə xətlərini qısa müddətdə darmadağın etdi. Şuşanın azad edilməsi isə qələbənin zirvəsi oldu. Şuşa uğrunda gedən döyüşlərdə göstərilən qəhrəmanlıq xalqın qəlbində əbədi iz qoydu. Bu qələbə həm də sübut etdi ki, Azərbaycan xalqı öz torpaqlarını azad etmək üçün hər cür çətinliyə sinə gərə bilər.
Hər böyük qələbənin arxasında güclü liderlik dayanır. Prezident İlham Əliyevin qətiyyəti və uzaqgörən siyasəti bu müharibədə həlledici rol oynadı. Onun beynəlxalq arenadakı çıxışları, diplomatik gedişləri və müharibə zamanı xalqa verdiyi mesajlar xalqın ruhunu yüksəltdi. Prezidentin hər çıxışı yalnız liderin iradəsini deyil, həm də xalqın mübarizəyə olan inamını əks etdirirdi. Onun “Qarabağ Azərbaycandır!” ifadəsi bu mübarizənin əsas simvoluna çevrildi. Bu sözlər təkcə tarixi həqiqəti deyil, həm də xalqın birliyini və milli ruhunu ifadə edirdi. Prezidentin həm döyüş meydanında, həm də diplomatik sahədə nümayiş etdirdiyi qətiyyət bu qələbənin əldə olunmasında əsas amillərdən biri oldu.
Müharibə zamanı xalqın bütün təbəqələri milli birliyə çağırdı. Müxtəlif etnik və dini qruplar bu qələbədə birgə iştirak edərək, Azərbaycançılıq ideologiyasının əsl gücünü nümayiş etdirdilər. Bu birlik həm döyüş meydanında, həm də arxa cəbhədə özünü göstərdi. Xaricdə yaşayan azərbaycanlılar da bu mübarizəyə dəstək verərək, beynəlxalq arenada ölkəmizin haqq səsini dünyaya çatdırdılar.
Azərbaycançılıq təkcə ölkə daxilində deyil, dünya azərbaycanlılarını birləşdirən ideologiya kimi qələbənin əsas təməlini təşkil etdi. Hər kəs bir hədəfə kökləndi: Qarabağın azad edilməsi və tarixi ədalətin bərpası.
Bu qələbə yalnız bir tarixi hadisə deyil, həm də gələcək nəsillər üçün örnəkdir. Qarabağ müharibəsində əldə olunan zəfər, yeni nəslin vətənpərvərlik ruhunda böyüməsi üçün böyük əhəmiyyət daşıyır. Məktəblərdə, ailələrdə bu qələbənin tarixi, qəhrəmanlarımızın şücaəti danışılır və gələcək nəsillərə ötürülür. Qarabağın azad edilməsi, təkcə bir torpağın geri alınması deyildi. Bu, həm də milli ruhun, qürurun və ləyaqətin qələbəsi idi. Xalqın bu birlik və həmrəyliyi gələcəkdə də Azərbaycanın ən böyük gücü olaraq qalacaq.
Xalqı birləşdirən qələbələr yalnız zəfər anları deyil, həm də millətin kimliyini formalaşdıran hadisələrdir. Qarabağın azad edilməsi ilə nəticələnən Vətən müharibəsi Azərbaycan xalqının birliyini, iradəsini və gücünü bütün dünyaya nümayiş etdirdi. Bu qələbə həm tarixi ədalətin bərpası, həm də Azərbaycanın gələcək inkişafı üçün bir başlanğıc nöqtəsi oldu. Xalqımız bu zəfəri öz birlik və həmrəyliyi ilə qazandı və gələcəkdə də bu birliyini qoruyaraq yeni zirvələrə çatacaq. Bu zəfərin mənəvi irsini yaşatmaq və gələcək nəsillərə çatdırmaq isə hər birimizin müqəddəs borcudur.
Bakı Qızlar Universitetinin tələbəsi Şəhla Zeynalova
Nəsimi rayon gənci
