“Brüssel enerji infrastrukturunun imkanlarının genişləndirilməsini maliyyələşdirməkdən imtina etməklə Macarıstan da daxil olmaqla Mərkəzi Avropanın təbii qazı haradan alması barədə söz sahibi olmaq üçün bütün hüquqi əsaslarını itirib”.
Bunu Macarıstanın xarici işlər naziri Peter Siyarto Budapeştdə azərbaycanlı həmkarı Ceyhun Bayramovla birgə keçirdiyi mətbuat konfransında deyib.
Peter Siyarto vurğulayıb ki, son illər hər iki ölkə – Azərbaycan və Macarıstan enerji təchizatının təhlükəsizliyi və iqtisadi artımın təmin olunması baxımından bu əməkdaşlıqdan faydalanır.
Nazir enerji mənbələrinin şaxələndirilməsi və yeni təbii qaz mənbələrinin cəlbini vacib adlandırıb və Azərbaycanın təkcə Macarıstan deyil, həm də Avropa perspektivindən real alternativi təmsil edə biləcəyini vurğulayıb.
“Sevindirici haldır ki, uzun illər davam edən danışıqlardan sonra bu il Azərbaycan və Macarıstan arasında təbii qazın fiziki axınına başlanılıb”, – deyə o qeyd edib.
Macarıstan XİN başçısı xatırladıb ki, Azərbaycandan 100 milyon kub metr qazın alınması və Macarıstanda 50 milyon kubmetr qazın saxlanılması ilə bağlı razılaşma əldə olunub.
O əlavə edib ki, hökumət bu rəqəmi daha da artıraraq ildə təxminən bir milyard kubmetrə çatdırmaq istəyir.
“Bunun uğurlu olub-olmayacağı artıq bizdən, hətta Azərbaycandan da yox, Avropa İttifaqından asılıdır. Vəziyyət ondan ibarətdir ki, hazırda Cənub-Şərqi Avropa enerji infrastrukturu Mərkəzi Avropa ölkələrinin diversifikasiya ehtiyaclarını ödəmək üçün kifayət qədər imkanlara malik deyil”, – deyə o bildirib.
Onun sözlərinə görə, hazırkı potensial Azərbaycan, Türkiyə və Qətər resurslarını regionun təchizatına cəlb etmək üçün yetərli deyil və Aİ bunu dəstəkləməyə hazır olana qədər bütün bunlar xəyal olaraq qalacaq.
“Avropa İttifaqı hələlik maliyyələşdirməyə töhfə verməkdən imtina etdiyinə görə Brüssel Mərkəzi Avropa ölkələrində, o cümlədən Macarıstanda təbii qazın haradan alınması ilə bağlı söz sahibi olmaq üçün bütün hüquqi əsaslarını itirib”, – deyə Peter Siyarto vurğulayıb./APA
