Hindistanda boya istehsalı sexində baş verən yanğın 5 saatdan sonra nəzarətə götürülüb. Hadisə nəticəsində 11 nəfər ölüb, 4 nəfər yaralanıb. Hindistanın paytaxtı Yeni Dehlidə boya istehsalı sexində naməlum səbəbdən yanğın baş verib. Yanğınsöndürmə briqadası rəsmilərinin verdiyi məlumata görə, yanğın dünən yerli vaxtla saat 17.25 radələrində sexin birinci mərtəbəsində başladığı üçün yuxarı mərtəbədəki işçilər binada sıxışıb.
Açıqlamada 22 yanğınsöndürən maşını ilə müdaxilə edilən yanğının 5 saat sonra nəzarətə götürüldüyü və binanın dağıldığı bildirilib. Ətrafdakı tikililərə yayılan alov nəzarət altına alındıqdan sonra 11 nəfərin cəsədi dağıntılar altından çıxarılıb. Hadisə zamanı yaralanan 4 nəfər xəstəxanaya aparılıb.
Yanğınla bağlı araşdırmalara başlanılıb.
Mənbə: hurriyyət.tr
Aynur Camal
