HƏMAS-ın Qəzza zolağının altında qazdığı tunellərdən birinin görüntüləri üzə çıxıb. Motosiklet sürən HƏMAS üzvünün kilometrlərlə uzunluğundakı tuneldə sürətlə hərəkət etdiyi görülüb. Qəzzada nə qədər oxşar tunel olduğu bilinməsə də, sosial mediada “İsrail bura girə bilməz, girsə belə çıxa bilməz” şərhləri edilib.
“Yeni Gundem” xəbər verir ki, İsrail blokadada saxladığı Qəzzanı 17 gündür bombardman edərkən, bölgədə ölənlərin sayı günü-gündən artır. İsrailin başlaması gözlənilən quru əməliyyatının HƏMAS-ın yerin altında inşa etdiyi tunellərə görə təxirə salındığı bildirilib.
HƏMAS-ın silahlı qanadı olan Qəssam Briqadalarının üzvü motosikletlə tuneldən tam sürətlə irəliləyən görüntüsü ortaya çıxıb. Video böyük təsir bağışlayıb və bəlkə də ilk dəfə olaraq kilometrlərlə uzanan tunel bu dərəcədə aydın görüntülənib.
İsrailin “Qəzza metrosu” adlandırdığı tunellər şəbəkəsinin ölçüsünü anlamaq çətin olsa da, bu şəbəkənin uzunluğu 41 kilometr, eni isə 10 kilometr olan Qəzza zolağının altında yerləşdiyi güman edilir.
Qəzzada nə qədər oxşar tunelin olduğu bilinmir.
Xatırladaq ki, 2021-ci ildə HƏMAS ilə İsrail arasında baş verən qarşıdurmadan sonra İsrail ordusu hava zərbələri nəticəsində 100 kilometrdən çox tunel sahəsini məhv etdiyini bildirib. HƏMAS isə tunellərinin 500 kilometrə qədər uzandığını və hücumlar zamanı yalnız 5 faizinin vurulduğunu iddia edib.
Qəzzada tunel tikintisi 2005-ci ildə İsrail əsgərlərini və mühacirlərini bölgədən çıxarmazdan əvvəl başlayıb. Lakin iki il sonra HƏMAS bölgəyə nəzarəti ələ keçirdikdən sonra tikinti sürətləndi. Bu, İsrail və Misirin malların və insanların bölgəyə daxil və xaricə hərəkətini məhdudlaşdıraraq blokada tətbiq etməsinə səbəb oldu.
Qeyd edilib ki, bir vaxtlar Misir sərhədinin altından keçən təxminən 2500 tunelin Həmas və digər qruplar tərəfindən ticarət malları, yanacaq və silah qaçaqmalçılığı üçün istifadə edildiyi güman edilir. 2010-cu ildən sonra İsrail sərhəd keçidlərini rahatlaşdırdıqdan sonra qaçaqmalçılıq Qəzza üçün əhəmiyyətini itirdi. Misir daha sonra tunelləri suya batıraraq və ya məhv edərək qaçaqmalçılığı dayandırdı.
“HƏMAS tunelləri yaddaşa görə tanıyır”
İsrail kəşfiyyat xidmətləri Fələstin tunel şəbəkəsinin bir hissəsinin marşrutunu bilir. Lakin ekspertlərin fikrincə, yerdə qalan hissələrin məxfi olması İsrailin Qəzza zolağında istənilən quru əməliyyatını çətinləşdirir. “Həmas tunellərini əzbər bilir. Onların bəzilərində tələlər var. Belə yerlərdə döyüşməyə hazırlaşmaq üçün israillilərin ola bilməyəcəyi geniş kəşfiyyat tələb olunur”, – bu barədə Nyu-Yorkda yerləşən Soufan analitik mərkəzinin tədqiqatçısı Kolin Klark deyib.
“İSRAİL BURADAN ÇIXA BİLMƏZ”
Digər tərəfdən, paylaşılan görüntüdən sonra insanlar sosial şəbəkələrdə ‘İsrail onsuz da bura girə bilməz, girsə belə, çıxa bilməz’ deyə şərhlər edilib.
Mənbə: TGRT Xəbərləri
Aynur Camal
