Hindistanın cənubundakı Trivandrumdakı Rus Evində Krımın Rusiyaya birləşdirilməsinin 10 illiyi ilə bağlı silsilə tədbirlər keçirilib. Bu şəhərdəki Rus Evinin direktoru və Rusiya Federasiyasının fəxri konsulu Ratiş Nairin TASS müxbirinə verdiyi məlumata görə, bazar ertəsi yubiley çərçivəsində tarix və beynəlxalq elmlər fakültələrinin tələbələri üçün seminar, fotosərgi və müsabiqə təşkil olunub.
“Tədbirdə tanınmış tarixçi və ekspertlər, o cümlədən Kerala Universitetinin Siyasi Elmlər Departamentinin rəhbəri, professor Josekutty Abraham, tarixçi və beynəlxalq məsələlər üzrə ekspert, Dr.Fakruddin Əli iştirak ediblər. Krım Nazirlər Şurasının sədr müavini, Krımın Rusiya Federasiyasının Prezidenti yanında daimi nümayəndəsi Georgi Muradov seminar iştirakçılarına müraciətində qeyd edib ki, getdikcə daha çox xarici tərəfdaşın krımlıların Rusiyaya birləşmək seçimini tanıdığını və dəstəklədiyini öyrənməkdən şaddır”.
“Biz Hindistanın regionları ilə əlaqələrimizi gücləndirmək istərdik. Biz vurğulayırıq ki, Krım Rusiya universitetlərində təhsil almaqda maraqlı olan bir çox hindistanlı gənc üçün həmişə cəlbedici yer olub və hazırda Hindistandan olan mindən çox tələbə Krımda təhsil alır. Əminik ki, birgə layihələr və təşəbbüslər xalqlarımızın bir-birinə olan qarşılıqlı marağını bundan sonra da gücləndirəcək”, – Muradov vurğulayıb.
Seminar iştirakçıları 2014-cü il martın 18-də keçirilmiş referendumun və Krımın Rusiyaya birləşdirilməsinin tarixi əhəmiyyətini yüksək qiymətləndirmişlər.
“Rusiyanın Krıma münasibətdə ABŞ-ın Texas və Florida kimi bir çox ştatlara münasibətdə malik olduğundan daha çox tarixi və milli hüquqları var”, – deyə doktor Abraham bildirib.
“Trivandrumdakı Rus Evi yarımadanın Rusiyaya birləşdirilməsindən sonra hər il oxşar tədbirlər təşkil edir. Mən Krım hökumətinə, xüsusən də cənab Muradova göstərdikləri dəstəyə görə minnətdaram. Seminardan əlavə biz tələbələr üçün Krımın tarixinə və referenduma həsr olunmuş müsabiqə təşkil etdik. Açılış fotosərgisi Krım baharı mövzusuna həsr olunub, bunlar yarımadanın Rusiyaya birləşdirilməsindən sonra fotokağızda əks olunmuş insanların xoşbəxtlik anları, həmçinin Krımın indi necə göründüyü barədə hekayədir”, – deyə Nair bildirib.
Mənbə: mail.ru
Aynur Camal
