Fransa prezidenti Emmanuel Makron Albaniyadakı təmasları çərçivəsində baş nazir Edi Rama ilə görüşüb.
“Yeni Gundem” xəbər verir ki, baş nazirlik binasındakı görüşdən sonra ikili ortaq mətbuat konfransı təşkil edib.
İrəliləməyə davam edəcəklərini və Albaniyanın “Avropada lövbər salmış ölkə” olduğuna inandığını qeyd edən Makron, Albaniyaya səfərinin ölkəsinin bölgəyə yenidən bağlılığı anlamına gəldiyini bildirib.
Avropa İttifaqının (AB) genişlənmə prosesinə və Albaniyanın Aİ-yə inteqrasiyasına toxunan Makron bunun Albaniya və xalqına verilən bir hədiyyə olmadığını ifadə edərək, “Başlanan genişlənmə prosesi həm sizin, həm də bizim üçün yaxşı bir prosesdir. Əks halda, bu sonsuz proseslər ictimai rəyi, hətta ən Avropayönümlü olanları belə ruhdan salmaq riski ilə üzləşdirəcək. Mən (genişlənməni) texniki baxımdan yox, siyasi cəhətdən istəyirəm”- deyib.
Avropa Siyasi Birliyi (AST) ilə bağlı qiymətləndirmələr edən Makron müdafiə, miqrasiya, enerji və geosiyasət kimi ortaq mövzularda hörmətlə danışa biləcəkləri bərabərhüquqluların birliyini hədəflədiklərini bildirib.
“Avropa özünü güc kimi görmək istəyirsə, geosiyasi taleyi varsa, yenidən birləşməlidir”, – Makron bildirib.
Kosovonun şimalındakı son gərginliyə toxunan Makron sözlərini belə davam etdirib: “Biz Priştina və Belqrad arasında mövcud gərginliyi çox diqqətlə izləyirik. Fransa və Almaniya güclü və yaxşı hesab etdiyim bir yol xəritəsi təklifi təqdim ediblər. Biz hər iki tərəfin buna hörmətlə yanaşmasını gözləyirik.
Albaniyanın baş naziri Rama da bildirib ki, Makronun səfəri Albaniyanın Avropa səyahətinin dönməz olduğunu təsdiqləyib.
İki ölkə arasında diplomatik əlaqələrin 100 ildən artıq olduğuna diqqət çəkən Rama, bir neçə il əvvəl imzaladıqları strateji tərəfdaşlıq müqaviləsini geniş əməkdaşlıq yolunun qurulmasının təməl daşı kimi qiymətləndirib.
Makronun səfərinin rəsmi səfərdən kənar dostluq səfəri olduğunu deyən Rama, bunun Fransa ilə Albaniya arasında əlaqələrin daha da dərinləşdirilməsi üçün bir öhdəlik səfəri olduğunu bildirib.
Kosovonun şimalındakı gərginliyə və Kosovo-Serbiya dialoquna toxunan Rama, hər iki tərəfin masasında Fransa-Almaniya planının olduğunu və bunun “Kosovonun başına gələ biləcək ən yaxşı şey” olduğunu qeyd edib.
Rama həmçinin sentyabrın 24-də Kosovonun şimalında baş verən hadisələrdə öldürülən silahlı qruplaşmanın 4 serb üzvü üçün Serbiyada “ümummilli matəm” elan edilməsini “anti-Avropa qalmaqalı” kimi qiymətləndirib.
Həmçinin Prezident Makronun səfəri çərçivəsində iki ölkə arasında müxtəlif sahələrdə əməkdaşlıq müqaviləsi imzalanıb. Makron Albaniyadakı təmasları çərçivəsində prezident Bayram Beqac ilə də görüşüb.
Mənbə: TrtHaber
Aynur Camal
