88 saylı Şamaxı seçki dairəsindən namizəd olan IV çağırış Milli Məclisin deputatı Tamam Cəfərovanın seçki kampaniyası o qədər də uğurlu getmir.
Şamaxıdan daxil olan məlumata görə, seçicilər Tamam Cəfərova ilə görüşə, demək olar ki, getmirlər. O, yalnız inzibati resursların hesabına görüşlərinə adam toplaya bilir.
Tamam Cəfərovanın çətinliklə üzləşməsi həm də 88 saylı dairədən namizədliyini irəli sürən Rauf Qurbanov faktoru ilə əlaqələndirilir.
Rauf Qurbanov uzun müddət Fövqəladə Hallar Nazirliyində (FHN) müxtəlif vəzifələrdə çalışıb.
Rauf Qurbanov 88 saylı Şamaxı seçki dairəsini təsadüfən seçməyib. O, əslən Şamaxıdandır. Həmçinin şəhərdə kifayət qədər nüfuza malikdir.
Bu baxımdan, seçicilərin diqqəti ona fokuslanıb.
Əldə etdiyimiz məlumatlara görə, uğurlu seçki kampaniyası aparan Rauf Qurbanov bu günlərdə təxribatla üzləşib. Onun təbliğat plakatlarını reklam lövhələrindən və başqa yerlərdən cırmağa başlayıblar. Maraqlıdır ki, reklam lövhəsində yalnız Tamam Cəfərovanın plakatı saxlanılıb. Bu fakt Şamaxıda müxtəlif mülahizələrə səbəb olub. Ehtimal olunur ki, reklam lövhələlərinə Tamam Cəfərovanın komandası “əl gəzdirib”. Bu iddianı səsləndirənlər hesab edir ki, əgər plakatlar, sadəcə, xuliqanlıq məqsədilə cırılsaydı, o zaman gərək Tamam Cəfərovanın da plakatı sıradan çıxarılardı.
Rauf Qurbanovun komandası hələlik bu ittihamı bölüşmür. Onlar məsələnin araşdırılmasına çalışırlar.
