“Son günlər Azərbaycanın kütləvi informasiya vasitələrində Ermənistanın Baş naziri vəzifəsini icra edən Nikol Paşinyanın səfər etdiyi sərhəd kəndinin adı erməni mediasına istinad olunaraq Kut kimi təqdim edilir. Bu, təkcə yanlış yox, həm də yaxın tariximizin təhrif olunmasıdır”.
“Yeni Gündəm” xəbər verir ki, bunu Azərbaycan Dövlət İqtisad Universitetinin müəllimi, siyasi elmlər üzrə fəlsəfə doktoru Pərviz Səmədov deyib.
Pərviz Səmədov bildirib ki, kəndin Azərbaycan üçün böyük strateji əhəmiyyəti olduğunu ermənilər yaxşı bilir: “Ermənilər onu da bilirlər ki, “Batum müqaviləsi”ndən sonra onlara aid edilməmiş bu yerlərin beynəlxalq hüquq prinsiplərinə zidd olaraq Ermənistana verilməsi də gündəmə gələ bilər. Ona görə də hay-küy qoparır, özlərini yerli sakin kimi qələmə verirlər. Hansı ki, Basarkeçər rayonunun digər kəndləri kimi, bu kənddə də 1988-ci ilədək 1 nəfər də erməni yaşamayıb. Kənddən hazırlanan reportajda erməni deyir ki, kəndin 18 şagirdi var. 1988-ci ilədək həmin məktəbin şagirdlərinin sayı 1000-ə yaxın idi. 370 evdən ibarət kəndin evlərini, eyni Qarabağımızda olduğu kimi, dağıdıb, talayıb, xaraba qoyublar. Cəmi 70 ev qalıb, ya qalmayıb”.
“Kəndin müalicəvi bulaqlarının – “Soyuqbulaq’, “Su tökülən”, “Kalvayı sadıqlar”ın suyu insan orqanizmi üçün çox əhəmiyyətli idi. Tülkü təpəsi, Üçdaşlar, Çalmalı, Ayı mağarası isə Kəlbəcər rayonunun təhlükəsizliyi baxımından son dərəcə strateji əhəmiyyətə malikdir. Onu da deyim ki, SSRİ zamanından dağların altında hərəkət edən vaqonların yolları dağaltı əlaqələr yaradılaraq hərbi məqsədlər üçün istifadə oluna bilər. Məhz buna görə də Zərkəndin tarixini, hərbi, strateji əhəmiyyətini diqqətdə saxlamalı, əzəli və əbədi yurdlarımıza həssas yanaşmalıyıq”, – deyə Pərviz Səmədov əlavə edib. / moderator.az
