İranlı rejissor Daryuş Mehrcui və həyat yoldaşı Vahide Mohammadifar Kərəc şəhərindəki evlərində bıçaqlanaraq öldürülüb. İran prezidenti qatillərin tapılması üçün xüsusi tapşırıqlar verib.
“Yeni Gundem” xəbər verir ki, Əlborz Əyalətinin Polis rəisi Həmid Hedavənd hadisə ilə bağlı verdiyi açıqlamada, “Dünən gecə Daryuş Mehrcuyi və həyat yoldaşı Vahide Mohammadifarın evlərində öldürüldüyü xəbərini qızları bizə çatdırdı”- deyib.
Polis qətlin şəxsiyyəti hələlik müəyyən edilməmiş şəxs və ya şəxslərin boyun və bədən hissələrinə vurduğu zərbələr nəticəsində baş verdiyini müəyyən edib. Hedavənd hadisənin təfərrüatlarını araşdırmaq üçün ekspert qrupunun yaradıldığını və qatillərin tutulması üçün lazımi təqiblərə başlanıldığını qeyd edib.
İran hökumətinin sözçüsü Əli Bahadıri Cehromi bildirib ki, prezident İbrahim Rəisi qətlin araşdırılması üçün polis və təhlükəsizlik qüvvələrinə xüsusi göstəriş verib. Çehromi, “Prezidentimiz bu ağrılı itki ilə bağlı sənətkarın ailəsinə və ölkənin sənət ictimaiyyətinə başsağlığı verərkən, polis və təhlükəsizlik orqanlarına bu məsələnin daha ciddi və sürətlə araşdırılması və lazımi tədbirlərin görülməsi üçün xüsusi tapşırıqlar verdi”- deyə vurğulayıb.
Gəncliyində ABŞ-da təhsil alan, daha sonra 5 il Fransada yaşayan Daryuş Mehrcui 1969-cu ildə bir kəndlinin inəyinə olan vəsvəsəsindən bəhs edən “The Cow” filmi ilə ölkə daxilində və beynəlxalq səviyyədə şöhrət qazanmışdı.
Mənbə: hurriyyət.tr
Aynur Camal
