Rusiyanın 158 raket və pilotsuz uçuş aparatı (PUA) ilə Ukrayna ərazisinə etdiyi hücumlar nəticəsində 12 nəfər həyatını itirib, 76 nəfər yaralanıb.
Rusiya-Ukrayna müharibəsi 674 gündür ki, davam edir.
Ukrayna Baş Qərargah rəisi Valeriy Zalujnı verdiyi açıqlamada Rusiyanın gecə saatlarından bəri 158 raket və pilotsuz uçuş aparatı (PUA) ilə Ukraynanı hədəf aldığını açıqlayıb.
Zalujnı bəyan edib ki, İran istehsalı olan 27 “Şahed-136/131” kamikadze PUA və 87 qanadlı raket vurulub. Ukrayna prezidenti Vladimir Zelenski sosial media hesabındakı paylaşımında Rusiyanın Kiyev, Lvov, Odessa, Dnepr, Xarkov və Zaporojyeni vurduğunu, hücumlar arasında doğum evləri, təhsil müəssisələri, ticarət mərkəzləri, çoxmərtəbəli binalar, fərdi yaşayış evləri, ticarət anbarları və dayanacaqları hədəfə aldığını bildirib.
Zelenski deyib: “Bu gün Rusiya öz arsenalında demək olar ki, bütün silahlardan, o cümlədən nüvə qabiliyyətinə malik hipersəsli Kindzall raketləri, S-300, qanadlı raketlər, strateji bombardmançıların buraxdığı X-101/X-505 raketləri və pilotsuz uçuş aparatlarından istifadə edir”. Zelenski deyib: “Biz terror hücumlarına mütləq cavab verəcəyik. Biz bütün ölkəmizin, hər bir şəhərimizin, hər bir vətəndaşımızın təhlükəsizliyi üçün mübarizəmizi davam etdirəcəyik.
Rusiya terrorizmi uduzmalıdır”.
Ukrayna Hərbi Hava Qüvvələri bəyan edib ki, əvvəllər heç vaxt eyni vaxtda belə bir sıra məntəqələr hədəfə alınmayıb.
Ukraynanın daxili işlər naziri İqor Klimenko verdiyi açıqlamada Rusiyanın Ukraynada genişmiqyaslı hücumları nəticəsində 12 nəfərin həyatını itirdiyini, 76 nəfərin isə yaralandığını açıqlayıb.
Ukraynanın paytaxtı Kiyevdə 2 nəfər ölüb, 18 nəfər yaralanıb. Lvovda isə 1 nəfər ölüb, 9 nəfər yaralanıb. Dneprdə ticarət mərkəzinə hücum nəticəsində 5 nəfər ölüb, 15 nəfər yaralanıb. Qara dəniz sahilində yerləşən Odessa liman şəhərində iki nəfər ölüb, ən azı 15 nəfər yaralanıb. Xarkovu hədəf alan hücumda 1 nəfər ölüb, 9 nəfər yaralanıb. Zaporiyada infrastruktura edilən hücumlarda isə 1 nəfər ölüb, 10 nəfər yaralanıb.
Mənbə: hurriyyət.tr
Aynur Camal
