12-14 oktyabr 2023-cü il tarixlərində Türkiyə Cümhuriyyətinin Konya şəhərində Necmettin Erbakan Universitetində VI Beynəlxalq və XVI Milli Xəstəxana və Səhiyyə İdarəetmə Konqresi keçirilib.
“Yeni Gundem”in məlumatına görə, konqresdə TƏBİB-in icraçı direktorun müavini Araz Nəsirov, Abşeron Rayon Mərkəzi Xəstəxanasının direktoru Azər İsmayılov Daxili nəzarət və monitorinq departamentinin Monitorinq şöbəsinin müdiri Elçin Ağayev, Strateji inkişaf departamentinin Proseslərin optimallaşdırılması şöbəsinin müdiri Ziya Məmmədzadə, Strateji inkişaf departamentinin Layihələrin idarəolunması şöbəsinin müdiri Fəqan Həsənzadə iştirak edib.
Konqresə 12.10.2023-cü il tarixindən start verilib. Tədbirin ilk günü İcraçı direktorun müavini Araz Nəsirova çıxış üçün söz verilib. O, açılış nitqində tədbirin təşkilatçılarına konqresin təşkili və xüsusi dəvətləri üçün təşəkkür edib.
Çıxış edən Abşeron Rayon Mərkəzi Xəstəxanasının direktoru Azər İsmayılov Azərbaycanda – Yevlax və Mingəçevir şəhərlərində İcbari Tibbi Sığorta üzrə Dövlət Agentliyi tərəfindən icbari tibbi sığorta ilə bağlı həyata keçirilən pilot layihələrdən və bu layihələrin ölkə üzrə tətbiqində yaxından iştirakı zamanı qarşılaşdığı xüsusi məqamlardan, əldə etdiyi təcrübələrdən bəhs edib. “Dövlət xəstəxanaların idarəedilməsində TƏBİB yanaşması” mövzusu ilə çıxışına davam edən Azər İsmayılov TƏBİB-in tabeliyində fəaliyyət göstərən ölkənin ən böyük tibb müəssilərində çalışdığını və bu müəssisələrdə yüksək səviyyəli əlçatan tibbi xidmətin təşkilinin və bununlada əldə edilən vətəndaş məmnuniyyətinin prioritet məsələsi olduğunu xüsusi vurğulayıb. Azərbaycan səhiyyəsinin TƏBİB-in idarəetməsilə böyük uğurlara imza atdığının və gün keçdikcə bu uğurlardan nəyinki ölkə səhiyyə sisteminin, hətta bir çox ölkərin də bundan nümunə götürəcəyini qeyd edərək paneldəki çıxışını yekunlaşdırıb.
Daha sonra Strateji inkişaf departamentinin Proseslərin optimallaşdırılması şöbəsinin müdiri Ziya Məmmədzadə, Strateji inkişaf departamentinin Layihələrin idarəolunması şöbəsinin müdiri Fəqan Həsənzadə və Daxili nəzarət və monitorinq departamentinin Monitorinq şöbəsinin müdiri Elçin Ağayev təqdimatla çıxış edib.
Oktyabrın 13-də TƏBİB-in nümayəndə heyəti ilə Necmettin Erbakan Universitetinin rektoru prof. dr. Cem Zorlu arasında görüş keçirilib.
Görüşdə TƏBİB və universitet arasında gələcək əməkdaşlıq və əlaqələr müzakirə olunub.
